अकलूज (युवापर्व) : अकलूज शहरात ग्रामदैवत अकलाई मंदिर परिसरातील किल्लाकडे जाणारा पुल, शनीमंदिर देशमुख घाट व किल्ला शाळा येथे अनेक अनोळखी मद्यधुंद अवस्थेतील रोडरोमिओ सतत थैमान माजवत आहेत. शहरातील गणेश चौक,काझी गल्ली मार्गे गुरुनगर परिसरातून दुचाकीवर भरधाव वेगाने हे नशेखोर सतत ये-जा करत असतात. यामुळे या परिसरातील महिला,शाळकरी मुली व लहान मुलांना घराबाहेर पडणे मुश्किल झाले आहे.
सदरील मद्यवस्थेतील रोडरोमिओ मुळे भविष्यात अपघात व गुन्हेगारी स्वरूपाची कृत्य घडण्याची शक्यता नाकारता येवू शकत नाही. याबाबत परिसरातील नागरिकांनी पोलीस प्रशासनाला लक्ष देण्याचे आवाहन केले आहे.
याच परिसरातील शनी मंदिर,गुरूनगर येथे नव्यानेच बसवण्यात आलेले सीसीटीव्ही कॅमेरे सध्या बंद अवस्थेत असून तात्काळ चालू करण्यात यावेत. याबाबत असंख्य नागरिकांनी निवेदनाद्वारे मागणी केली असून आपण या मद्यधुंद रोडरोमिओच्या मुसक्या आवळाव्यात ही अशी मागणी परिसरातील संतप्त नागरिकांकडून केली जात आहे.
